୨୨ରେ ଫିକ୍କି ମହିଳା ସଂଗଠନ ପକ୍ଷରୁ ଇ-କମର୍ସ ସଂପର୍କିତ ୱେବିନାର୍
ଭୁବନେଶ୍ୱର : କରୋନା ମହାମାରୀ ଦ୍ୱାରା ଆମ ଅର୍ଥନୀତି ଗୁରୁତରଭାବେ ପ୍ରଭାବିତ ହୋଇଛି । ସାରା ବିଶ୍ୱରେ ଅନେକ ଲୋକ ନିଜର କର୍ମସଂସ୍ଥାନ ହରାଉଛନ୍ତି । ଲକ୍ଷ ଲକ୍ଷ ପ୍ରବାସୀ ରୋଜଗାର ହରାଇ ନିଜ ନିଜ ରାଜ୍ୟକୁ ଫେରୁଛନ୍ତି । ଏପରି ସ୍ଥିତିରେ ଯଦି ଏହି ପ୍ରବାସୀ ଓ ବେରୋଜଗାର ଲୋକଙ୍କୁ ନିଯୁକ୍ତି ସୁଯୋଗ ଦେଲେ କିପରି ହୁଅନ୍ତା ? କିପରି ହୁଅନ୍ତା ଯଦି ଆମେ ଏହି ଶ୍ରମଶକ୍ତିକୁ ଆହୁରି ଦକ୍ଷ ଓ କୁଶଳୀ କରିପାରନ୍ତେ?
Sambad is now on WhatsApp
Join and get latest news updates delivered to you via WhatsApp
ଏସବୁ ପ୍ରଶ୍ନର ଉତ୍ତର ଖୋଜିବା ପାଇଁ ଫିକ୍କି ମହିଳା ସଂଗଠନ, ଭୁବନେଶ୍ୱର ଚାପ୍ଟର ପକ୍ଷରୁ ସେଞ୍ଚୁରିଅନ୍ ବିଶ୍ୱବିଦ୍ୟାଳୟ ଓ ଗ୍ରାମ ତରଙ୍ଗ ସହଯୋଗିତାରେ କୋଭିଡ-୧୯ ପରର କ୍ୟାରିୟର ସମ୍ଭାବନା ଓ ସୁଯୋଗ ସଂପର୍କରେ ପରାମର୍ଶ ଦେବା ପାଇଁ ଏକ ୱେବିନାର୍ ସିରିଜ ଆରମ୍ଭ କରାଯାଇଛି । ଏସବୁ ୱେବିନାରରେ ଶିଳ୍ପଜଗତର ବିଶେଷଜ୍ଞମାନେ ଅଂଶଗ୍ରହଣ କରି ସେମାନଙ୍କର ମତ ଉପସ୍ଥାପନ କରିବା ସହ ପରାମର୍ଶ ଦେବେ । ମୁଖ୍ୟତଃ ଦଶମ ଓ ଦ୍ବାଦଶ ଶ୍ରେଣୀ ପାସ କରିଥିବା ଛାତ୍ରଛାତ୍ରୀ ଓ ଅଭିଭାବକମାନଙ୍କୁ ଲକ୍ଷ୍ୟରେ ରଖି ଏହି କାର୍ଯ୍ୟକ୍ରମ କରାଯାଉଛି।
ଏହି କ୍ରମରେ ଦ୍ବିତୀୟ ୱେବିନାର୍ ଆସନ୍ତାକାଲି ଅର୍ଥାତ ୨୨ ଜୁନ ୨୦୨୦, ସୋମବାର ଦିନ ୧୧ଟାରୁ ୧୨ଟା ପର୍ଯ୍ୟନ୍ତ ଅନୁଷ୍ଠିତ ହେବ ଏବଂ ଏଥରର ବିଷୟ ରହିଛି ‘ଇ-କମର୍ସ’ । ମେଡିକା ବଜାରର ମାନବ ସମ୍ବଳ ବିକାଶ ବିଭାଗ ମୁଖ୍ୟ ଅନୀଲ ମହାନ୍ତି ଏହି ୱେବିନାରରେ ଯୋଗ ଦେଇ ଇ-କମର୍ସର ବିଭିନ୍ନ କ୍ଷେତ୍ର ଓ କ୍ୟାରିୟର ସମ୍ଭାବନା ଉପରେ ଆଲୋଚନା କରିବେ । ଗ୍ରାମ ତରଙ୍ଗର ୟୁଟ୍ୟୁବ୍ ଏବଂ ଫେସବୁକ୍ ପେଜରେ ଏହାର ଲାଇଭ୍ ଷ୍ଟ୍ରିମିଂହେବ। ଏହି ୟୁଟ୍ୟୁବ୍ ଲିଙ୍କ ମାଧ୍ୟମରେ ୱେବିନାର ସହ ସଂଯୁକ୍ତ ହୋଇ ହେବ। https://www.youtube.com/channel/UCTCyIQ0v_0LuwVMcHngdeVw
ଏହା ମାଧ୍ୟମରେ କୋଭିଡ-୧୯ ପରର କ୍ୟାରିୟର ସମ୍ଭାବନା ଓ ସୁଯୋଗ ସଂପର୍କରେ ବିଭିନ୍ନ ଜରୁରୀ କଥା ଜାଣିବାକୁ ଛାତ୍ରଛାତ୍ରୀମାନଙ୍କୁ ଫିକ୍କି ମହିଳା ସଂଗଠନ, ଭୁବନେଶ୍ୱର ଚାପ୍ଟରର ଅଧ୍ୟକ୍ଷା ଧରିତ୍ରୀ ପଟ୍ଟନାୟକ ଅନୁରୋଧ କରିଛନ୍ତି । ଏହି କ୍ଷେତ୍ର ଉପରେ କ୍ୟାରିୟର ସଚେତନତା ସୃଷ୍ଟି କରି ଛାତ୍ରଛାତ୍ରୀଙ୍କ ଭବିଷ୍ୟତ ଗଢିବାରେ ଫିକ୍କି ମହିଳା ସଂଗଠନ ସହାୟକ ହୋଇପାରିବ ସଂଗଠନ ପକ୍ଷରୁ ଆଶା ପ୍ରକାଶ କରାଯାଇଛି । ୨୨ ଜୁନ ୨୦୨୦, ସୋମବାର ଦିନ ୧୧ଟାରେ ୟୁଟ୍ୟୁବରେ ଗ୍ରାମ ତରଙ୍ଗ ପେଜ ଖୋଲିବାକୁ ଭୁଲନ୍ତୁ ନାହିଁ ।