ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କ ବାପ ଘର ଗାଁରେ ବିଦ୍ୟୁତ୍ ବଲ୍ବ ଜଳିଲା, ନିଜ ଗାଁକୁ କେବେ ନିର୍ମାଣ ହେବ ପକ୍କା ରାସ୍ତା?
ରାଇରଙ୍ଗପୁର: ଏନ୍ଡିଏର ରାଷ୍ଟ୍ରପତି ପ୍ରାର୍ଥୀ ଦ୍ରୌପଦୀ ମୁର୍ମୁଙ୍କ ନିଜ ଗ୍ରାମ ହେଉଛି ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଉପଖଣ୍ଡ ଅନ୍ତର୍ଗତ କୁସୁମୀ ବ୍ଲକ ପାହାଡପୁର ଗ୍ରାମରେ । ସେ ରାଷ୍ଟ୍ରପତି ପ୍ରାର୍ଥୀ ହେବା ପରେ ତାଙ୍କ ପୈତୃକ ଗ୍ରାମ କୁସୁମୀ ବ୍ଲକ ଉପରବେଡ଼ା ଗ୍ରାମର ଡୁଙ୍ଗୁରିସାହିରେ ବିଦ୍ୟୁତ୍ ନଥିବା ଖବର ସୋସିଆଲ ମିଡିଆରେ ଭାଇରାଲ୍ ହୋଇଥିଲା ଏବଂ ମାତ୍ର ୩ ଦିନ ମଧ୍ୟରେ ୧୮ଟି ପରିବାରକୁ ବିଦ୍ୟୁତ୍ ସଂଯୋଗ କରାଯାଇଥିଲା। ଏବେ ଡଙ୍ଗୁରିସାହି ଗାଁର ଲୋକେ ବିଦ୍ୟୁତ୍ ଆଲୁଅ ଦେଖୁଛନ୍ତି। କିନ୍ତୁ ଶାଶୁ ଗ୍ରାମ ପାହାଡପୁରର ଡୁଙ୍ଗୁରିସାହିରେ ଏପର୍ଯ୍ୟନ୍ତ ପକ୍କା ରାସ୍ତା ନିର୍ମାଣ ହୋଇନି। ଉକ୍ତ ରାସ୍ତାଟି ଡୁଙ୍ଗୁରିସାହିରୁ ଉପରସାହିକୁ ୧ କି.ମି ପାଖାପାଖି କଚ୍ଚା ରାସ୍ତା ଦେଇ ଚାଲିକି ଯିବାକୁ ପଡ଼ିଥାଏ।
Sambad is now on WhatsApp
Join and get latest news updates delivered to you via WhatsApp
ବର୍ତ୍ତମାନ ବର୍ଷାଦିନ ଥିବାରୁ ଉକ୍ତ ରାସ୍ତାରେ ଚାରି ଚକିଆ ଯାନ ତ ଦୂରର କଥା ସାଇକେଲ ମଧ୍ୟ ଉକ୍ତ ରାସ୍ତାରେ ଗଡିବା କଷ୍ଟକର ହୋଇଯାଉଛି । ଉକ୍ତ ରାସ୍ତାଟି କାଦୁଅ ପୋଚ ପୋଚ ହେଉଥିବାରୁ ଡୁଙ୍ଗୁରିସାହିର ଲୋକେ ଉକ୍ତ ରାସ୍ତାରେ ନଯାଇ ଅନ୍ୟ ବିଲର ହିଡ ରାସ୍ତାରେ ଯିବାଆସିବା କରିଥାନ୍ତି । ବର୍ଷା ଦିନରେ ଉକ୍ତ ସାହିର କାହାରି ଦେହ ଅସୁସ୍ଥ କିମ୍ବା ପ୍ରସୂତୀମାନଙ୍କୁ ୧୦୮ ଆମ୍ବୁଲାନ୍ସ ପାଖକୁ ନେବା ପାଇଁ ହେଲେ ଖଟିଆରେ ବହିକି ନେବାକୁ ପଡିଥାଏ ।
ଗ୍ରାମବାସୀଙ୍କଠାରୁ ପ୍ରକାଶ ଯେ ଉକ୍ତ ରାସ୍ତାରେ କେବଳ ଥରେ ମନରେଗା ଯୋଜନାରେ ମାଟିରେ ରାସ୍ତା ନିର୍ମାଣ ହୋଇଥିଲା। ସେଥିରେ ମଧ୍ୟ ଗଛ ଉଠିଯାଇଥିବା ଦେଖିବାକୁ ମିଳିଛି । ତାହା ପରଠାରୁ ଆଉ କାମ ହୋଇନାହିଁ । ତେବେ ଉକ୍ତ ସାହିରେ ୧୫ରୁ ଅଧିକ ପରିବାର ବସବାସ କରୁଥିବା ସୂଚନା ମିଳିଛି । ତେବେ ଉକ୍ତ ସାହିକୁ କେବେ ରାସ୍ତା ନିର୍ମାଣ ହେବ ତାହା ଦେଖିବାକୁ ବାକି ରହିଲା ।