କଣ୍ଟାବାଞ୍ଜି: ଭିଜିଲାନ୍ସ ଜାଲରେ ପଡିଛନ୍ତି ବଙ୍ଗୋମୁଣ୍ଡା ପଞ୍ଚାୟତ ସମିତି କଲେଜ ଅଧ୍ୟକ୍ଷା। କଲେଜ ଲାଇବ୍ରେରିଆନଙ୍କଠାରୁ ଅଧ୍ୟକ୍ଷା ମିନତି ରଥ ୮୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ଭିଜିଲାନ୍ସ ହାତରେ ଧରାପଡିଥିଲେ। ବଲାଙ୍ଗୀର–ସୋନପୁର–ସମ୍ବଲପୁର ଭିଜିଲାନ୍ସ ଟିମ ଏହି ଚଢ଼ାଉରେ ସାମିଲ ଥିଲେ । ଲାଇବ୍ରେରିଆନ ଡୋଲାମଣି ମେହେର କୌଣସି ଛୁଟି ଦରଖାସ୍ତ ନ ଦେଇ ଗୋଟିଏ ଦିନ କଲେଜ ଆସି ନଥିଲେ। ତେବେ ଅଧ୍ୟକ୍ଷା ଲାଇବ୍ରେରିଆନଙ୍କୁ କାହିଁକି କଲେଜ ଆସିଲ ନାହିଁ ବୋଲି ପଚାରି କାରଣ ଦର୍ଶାଅ ନୋଟିସ ଦେବା ସହ ୧ ଲକ୍ଷ ଟଙ୍କା ନ ଦେଲେ ଚାକିରିରୁ ବିଦା କରିଦେବି ବୋଲି ଧମକ ଦେଇ ଆସୁଥିଲେ। ଲାଇବ୍ରେରିଆନଙ୍କୁ ଅଧ୍ୟକ୍ଷା ପ୍ରଥମେ ୮୦ ହଜାର ଏବଂ ପରେ ୨୦ ହଜାର ଟଙ୍କା ଦେବାକୁ ଚାପ ପକାଉଥିଲେ । ସୋମବାର ଅଧ୍ୟକ୍ଷା ତାଙ୍କ ଘରେ ୮୦ ହଜାର ଟଙ୍କା ଲାଞ୍ଚ ନେଉଥିବା ବେଳେ ପୂର୍ବରୁ ପ୍ରସ୍ତୁତ ହୋଇ ରହିଥିବା ଭିଜିଲାନ୍ସ ଟିମ ହାତରେ ଧରା ପଡିଥିଲେ। ଭିଜିଲାନ୍ସ ଟିମ ଅଧ୍ୟକ୍ଷାଙ୍କ ଆୟ ବହିଭୂର୍ତ ସମ୍ପତ୍ତି ଯାଞ୍ଚ କରୁଛି।